​Soma shairi kisha ujibu maswali MODEL23122022002

​​SOMA SHAIRI KISHA UJIBU MASWALI MODEL23122022002

Nizike Ningali Hai!: Hassam Muchai
Kipusa Binti Hamadi, siku n’takuwa kimba
Nizikwe Kifudifudi, na yoyo kuyumbayumba 
Takuwa bure biladi, matozi ungayasomba
Nizike ningali hai, n’kifa hutonizika

Tena ningaumwa ungo, na mapumu kuugua
Lioze ini na nyongo, na pua zisipumua
Takuwa sina kinyongo, mradi nimeshatua
Nizike ningali hai, n’kifa hutonizika

Nizike sasa mwenzangu, nizike ningali hai
Singojee kufa kwangu, uanze kurairai
Kulilia kifo change, ni bure hakukufai 
Nizike ningali hai, n’kifa hutonizika

Nikifa hutonizika, kimwana sanda nunua
Manukato ya kupaka, na nguo za kuanua
Nivishe sione shaka, Washindwe kupambanua 
Nizike ningali hai, n’kifa hutonizika 

Tena nikande misuli, nikande pande kwa pande 
Siate kiwiliwili, shingo, miguu ikande
Umalizapo kiwiliwili, mwenzangu niende shonde
Nizike ningali hai, n’kifa hutonizika

MASWALI

A) Dhamira ya matunzi wa shairi hili ni gani? (Al 2)
B) Bainisha nafsineni katika shairi hili (Al 2)
C) Eleza toni ya shairi hili (Al 2)
D) Changanua muundo wa shairi hili (Al 5)
E) Fafanua maana ya kibwagizo cha shairi hili (Al 2)
F) Eleza mbinu nne ambazo mshairi ametumia kutosheleza mahitaji ya kiarudhi (Al 4)
G) Bainisha bahari ya shairi hili (Al 3)

MONGOZO / MAJIBU

​a) Dhamira ya mtunzi wa shairi hili ni gani?
Kuhimiza watu kutendea wenzao mema wakiwa wangali hai 

b) Bainisha nafsineni katika shairi hili 
Kipusa Binti Hamadi – Kipusa Binti Hamadi, siku n’takuwa kimba 

c) Eleza toni ya shairi hili 
Toni ya kushauri – Kipusa Binti Hamadi anatoa ushauri kwamba azikwe angali hai.

​d) Changanua muundo wa shairi hili 
i) Lina ubeti 5 
ii) Kila ubeti una mishororo minne 
iii) Kila mshororo una vipande viwili isipokuwa ubeti wa tano , mshororo wa pili wenye vipande vitatu 
iv) Vina vya ndani na vya nje vinabadilika katika ubeti 
v) Lina kibwagizo – Nizike ningali hai, n’kifa hutonizika 
vi) Kila mshororo una mizani 16

e) Fafanua maana ya kibwagizo cha shairi hili 
Nisaidie ningali hai kwa maana nikifa hutaweza kunisaidia 

f) Eleza mbinu nne amabazo mshairi ametumia kutosheleza mahitaji ya kiarudhi 
i) Kufinyanga sarufi

•  Matozi ungayasomba – ungayasomba matozi 
•  na mapumu kuugua – na kuugua mapumu 
•  sanda nunua – nunua sanda 

 
ii) Lahaja 

•  Matozi – machozi 
•  siate – siache 

iii)Tabdila

•  hutonizika – hutanizika 
•  zisipumua – zisipumue 

iv) Inkisari

•   takuwa – nitakuwa 
•   singojee - usingojee

g) Bainisha  bahari ya shairi hili
 i) Tarbia – lina mshororo minnne katika kila ubeti 
 ii)Mathnawi – Kila mshororo una vipande viwili isipokuwa ubeti wa tano, mshororo wa pili wenye vipande vitatu. 
 iii)Ukaraguni – Vina vya kati na vya nje vinabadilika katika kila ubeti. ​